ਰੇਖ਼ਤਾ ਫ਼ਾਊਂਡੇਸ਼ਨ ਨੇ ਖ਼ਾਸ ਕਰਕੇ ਉਰਦੂ ਸਾਹਿਤ ਦੇ ਪ੍ਰਚਾਰ ਅਤੇ ਪ੍ਰਸਾਰ ਦੇ ਉਦੇਸ਼ ਨਾਲ ਇਕ ਮੁਫ਼ਤ ਵੈੱਬਸਾਈ Rekhta.org ਕ਼ਾਇਮ ਕੀਤੀ ਹੈ। ਇਸ ਦਾ ਮਕ਼ਸਦ ਉਰਦੂ ਲਿੱਪੀ ਤੋਂ ਅਣਜਾਣ ਪਾਠਕਾਂ ਤੱਕ ਵੀ ਉਰਦੂ ਸਾਹਿਤ ਨੂੰ ਪਹੁੰਚਾਉਣਾ ਹੈ। ਵੈੱਬਸਾਈਟ ਉੱਤੇ ਉਰਦੂ ਦੇ ਨਾਲ-ਨਾਲ ਦੇਵਨਾਗਰੀ ਅਤੇ ਰੋਮਨ ਲਿਪੀ ਵਿਚ ਵੀ ਸਾਰੀ ਸਮੱਗਰੀ ਉਪਲਬਧ ਹੈ। ਅੱਜ ਇਹ ਵੈੱਬਸਾਈਟ ਦੁਨੀਆ ਦੇ 160 ਤੋਂ ਵੱਧ ਦੇਸ਼ਾਂ ਵਿਚ ਪੜ੍ਹੀ ਜਾਂਦੀ ਹੈ। ਥੋੜ੍ਹੇ ਹੀ ਸਮੇਂ ਵਿਚ ਇਸ ਨੇ ਵੱਡੀ ਪ੍ਰਸਿੱਧੀ ਹਾਸਿਲ ਕੀਤੀ ਹੈ ਅਤੇ ਆਮ ਪਾਠਕਾਂ, ਉਰਦੂ-ਪ੍ਰੇਮੀਆਂ ਅਤੇ ਭਾਰਤ, ਪਾਕਿਸਤਾਨ ਸਮੇਤ ਸੰਸਾਰ ਭਰ ਦੇ ਉਰਦੂ ਵਿਦਵਾਨਾਂ ਵੱਲੋਂ ਇਸ ਦੀ ਕਾਫ਼ੀ ਪ੍ਰਸ਼ੰਸਾ ਕੀਤੀ ਗਈ ਹੈ। ਉਰਦੂ ਸ਼ਾਇਰੀ ਨਾਲ ਸੰਬੰਧਿਤ ਵੈੱਬਸਾਈਟਾਂ ਵਿਚ ਇਹ ਸਭ ਤੋਂ ਵੱਧ ਸ਼ਾਇਰਾਂ ਦੀਆਂ ਰਚਨਾਵਾਂ ਉਪਲਬਧ ਕਰਵਾਉਂਦੀ ਹੈ। ਇਹ ਉਰਦੂ ਸ਼ਾਇਰੀ ਦਾ ਸਭ ਤੋਂ ਵੱਡਾ ਆਨਲਾਈਨ ਖ਼ਜ਼ਾਨਾ ਹੈ, ਜਿਸ ਵਿਚ ਪਿਛਲੀਆਂ ਤਿੰਨ ਸਦੀਆਂ ਦੇ 2500 ਤੋਂ ਵੱਧ ਉਰਦੂ ਸ਼ਾਇਰਾਂ ਦੀਆਂ 30,000 ਤੋਂ ਵੱਧ ਗ਼ਜ਼ਲਾਂ ਅਤੇ ਨਜ਼ਮਾਂ ਸ਼ਾਮਿਲ ਹਨ। ਵੈੱਬਸਾਈਟ ਵਿਚ ਕਈ ਅਜਿਹੀਆਂ ਸੁਵਿਧਾਵਾਂ ਹਨ ਜੋ ਇਸ ਨੂੰ ਵਰਤੋਂ ਦੇ ਅਨੁਕੂਲ ਬਣਾਉਂਦੀਆਂ ਹਨ। ਇਸ ਦੀ ਸਮਰੱਥ ਖੋਜ-ਵਿਧੀ ਰਾਹੀਂ ਪਾਠਕ ਆਪਣੀ ਲੋੜ ਅਨੁਸਾਰ ਸਮੱਗਰੀ ਆਸਾਨੀ ਨਾਲ ਲੱਭ ਸਕਦੇ ਹਨ। ਇਸ ਵਿਚ ਇਕ ਵਿਲੱਖਣ ਸ਼ਬਦਾਵਲੀ (Glossary) ਵੀ ਸ਼ਾਮਿਲ ਹੈ, ਜਿਸ ਦੀ ਮਦਦ ਨਾਲ ਕਿਸੇ ਵੀ ਸ਼ਬਦ ਦਾ ਅਰਥ ਇਕ ਕਲਿੱਕ ਨਾਲ ਜਾਣਿਆ ਜਾ ਸਕਦਾ ਹੈ। ਨਵੇਂ ਪਾਠਕਾਂ ਨੂੰ ਉਰਦੂ ਦੇ ਲਹਿਜੇ ਅਤੇ ਉਚਾਰਨ ਨਾਲ ਜਾਣੂ ਕਰਵਾਉਣ ਲਈ ਕਈ ਰਚਨਾਵਾਂ ਨੂੰ ਸ਼ਾਇਰਾਂ ਅਤੇ ਪੇਸ਼ੇਵਰ ਵਾਚਕਾਂ ਦੀਆਂ ਆਵਾਜ਼ਾਂ ਵਿਚ ਰਿਕਾਰਡ ਕਰਕੇ ਪਾਠ ਸਮੇਤ ਉਪਲਬਧ ਕਰਵਾਇਆ ਗਿਆ ਹੈ। ਰੇਖ਼ਤਾ ਨੇ ਉਰਦੂ ਸ਼ਾਇਰੀ ਦੇ ਨਵੇਂ ਪਾਠਕਾਂ ਲਈ ਇਕ ਵਿਸ਼ੇਸ਼ ਭਾਗ ਵੀ ਸ਼ੁਰੂ ਕੀਤਾ ਹੈ, ਜਿਸ ਵਿਚ ਆਸਾਨ ਅਤੇ ਮਸ਼ਹੂਰ ਗ਼ਜ਼ਲਾਂ ਤੇ ਨਜ਼ਮਾਂ ਨੂੰ ਮਸ਼ਹੂਰ ਗਾਇਕਾਂ, ਕਲਾਕਾਰਾਂ ਅਤੇ ਸ਼ਾਇਰਾਂ ਦੀਆਂ ਵੀਡੀਓ ਪੇਸ਼ਕਾਰੀਆਂ ਨਾਲ ਪੇਸ਼ ਕੀਤਾ ਜਾਂਦਾ ਹੈ। ਇਸ ਤੋਂ ਇਲਾਵਾ, ਰੇਖ਼ਤਾ ਨੇ ਉਰਦੂ ਸਾਹਿਤ—ਸ਼ਾਇਰੀ ਅਤੇ ਵਾਰਤਕ ਦੋਵਾਂ—ਦੇ ਡਿਜ਼ੀਟਲੀ ਰੂਪ ਦਾ ਮਹੱਤਵਪੂਰਨ ਉਪਰਾਲਾ ਸ਼ੁਰੂ ਕੀਤਾ ਹੈ, ਤਾਂ ਜੋ ਦੁਰਲੱਭ ਅਤੇ ਪ੍ਰਸਿੱਧ ਉਰਦੂ ਪੁਸਤਕਾਂ ਨੂੰ ਸੰਭਾਲਿਆ ਜਾ ਸਕੇ। ਨਿੱਜੀ ਸੰਗ੍ਰਹਿਆਂ ਤੋਂ ਕਿਤਾਬਾਂ ਇਕੱਠੀਆਂ ਕਰਨ ਦੇ ਨਾਲ-ਨਾਲ ਕਈ ਲਾਇਬ੍ਰੇਰੀਆਂ ਅਤੇ ਸੰਸਥਾਵਾਂ ਨਾਲ ਮਿਲ ਕੇ ਉਨ੍ਹਾਂ ਦੇ ਸੰਗ੍ਰਹਿਆਂ ਨੂੰ ਵੀ ਡਿਜ਼ੀਟਲ ਰੂਪ ਵਿਚ ਸੰਭਾਲਣ ਦਾ ਕਾਰਜ ਕੀਤਾ ਹੈ। ਰੇਖ਼ਤਾ ਨੇ ਨੌਜਵਾਨ ਅਤੇ ਉਭਰਦੇ ਹੋਏ ਸ਼ਾਇਰਾਂ ਨੂੰ ਆਪਣੀਆਂ ਰਚਨਾਵਾਂ ਪੇਸ਼ ਕਰਨ ਲਈ ਇਕ ਮੰਚ ਵੀ ਮੁਹੱਈਆ ਕਰਵਾਇਆ ਹੈ। ਇਸ ਤਹਿਤ ਉਨ੍ਹਾਂ ਦੀਆਂ ਵੀਡੀਓ ਰਿਕਾਰਡ ਕਰਕੇ ਰੇਖ਼ਤਾ ਦੀ ਵੈੱਬਸਾਈਟ ਅਤੇ ਯੂ-ਟਿਊਬ ਚੈਨਲ ਉੱਤੇ ਪ੍ਰਕਾਸ਼ਿਤ ਕੀਤੀਆਂ ਜਾਂਦੀਆਂ ਹਨ। ਇਸ ਦੇ ਨਾਲ ਹੀ ਭਾਰਤ, ਪਾਕਿਸਤਾਨ, ਕੈਨੇਡਾ, ਮੱਧ-ਪੂਰਬ ਅਤੇ ਹੋਰ ਦੇਸ਼ਾਂ ਦੇ ਪ੍ਰਸਿੱਧ ਸਾਹਿਤਕਾਰਾਂ ਦੀਆਂ ਗੱਲਬਾਤਾਂ ਅਤੇ ਪਾਠ ਵੀ ਉਪਲਬਧ ਹਨ। ਵੈੱਬਸਾਈਟ ਨੂੰ ਹਾਲ ਹੀ ਵਿੱਚ ਪੂਰੀ ਤਰ੍ਹਾਂ ਰਿਸਪਾਂਸਿਵ ਬਣਾਇਆ ਗਿਆ ਹੈ, ਜਿਸ ਕਾਰਨ ਡੈਸਕਟਾਪ, ਲੈਪਟਾਪ, ਟੈਬਲੈਟ ਅਤੇ ਮੋਬਾਈਲ ਫ਼ੋਨਾਂ ਸਮੇਤ ਹਰ ਤਰ੍ਹਾਂ ਦੇ ਯੰਤਰਾਂ ਉੱਤੇ ਇਸ ਦੀ ਵਰਤੋਂ ਆਸਾਨ ਹੋ ਗਈ ਹੈ। ਇਸ ਨਾਲ ਦੂਰ-ਦੁਰਾਡੇ ਇਲਾਕਿਆਂ ਦੇ ਪਾਠਕ ਵੀ ਇਸ ਸਰੋਤ ਤੱਕ ਆਸਾਨੀ ਨਾਲ ਪਹੁੰਚ ਸਕਦੇ ਹਨ। ਇਸੇ ਤਰ੍ਹਾਂ ਰੇਖ਼ਤਾ ਫ਼ਾਊਨਡੇਸ਼ਨ ਦੀਆਂ ਉਰਦੂ ਤੋਂ ਇਲਾਵਾ ਹਿੰਦੀ ਸਾਹਿਤ ਨੂੰ ਸਹੇਜਣ ਲਈ ਹਿੰਦਵੀ, ਗੁਜਰਾਤੀ ਸਾਹਿਤ ਲਈ ਰੇਖ਼ਤਾ ਗੁਜਰਾਤੀ, ਰਾਜਸਥਾਨੀ ਬੋਲੀ ਲਈ ਅੰਜਸ ਅਤੇ ਸੂਫ਼ੀ ਸਾਹਿਤ ਲਈ ਰੇਖ਼ਤਾ ਸੂਫ਼ੀਨਾਮਾ ਵੈੱਬਸਾਈਟਸ ਵੀ ਕਾਮਯਾਬੀ ਨਾਲ਼ ਚੱਲ ਰਹੀਆਂ ਹਨ। ਜਿੰਨ੍ਹਾਂ 'ਤੇ ਚੰਗੀ ਚੋਖੀ ਤਾਦਾਦ ਵਿਚ ਸਾਹਿਤ ਮੌਜੂਦ ਹੈ।