ਸੰਜੀਵ ਸਰਾਫ਼ ਪੌਲੀਪਲੈਕਸ ਕਾਰਪੋਰੇਸ਼ਨ ਲਿਮਿਟੇਡ ਦੇ ਸੰਸਥਾਪਕ, ਚੇਅਰਮੈਨ ਅਤੇ ਮੁੱਖ ਹਿੱਸੇਦਾਰ ਹਨ। ਇਹ ਕੰਪਨੀ ਪੀ.ਈ.ਟੀ. (PET) ਫ਼ਿਲਮਾਂ ਦੇ ਉਤਪਾਦਨ ਦੇ ਖੇਤਰ ਵਿਚ ਦੁਨੀਆ ਦੀਆਂ ਸਭ ਤੋਂ ਵੱਡੀਆਂ ਕੰਪਨੀਆਂ ਵਿਚੋਂ ਇਕ ਹੈ। 30 ਦਸੰਬਰ 1958 ਨੂੰ ਜਨਮੇ ਸੰਜੀਵ ਸਰਾਫ਼ ਨੇ ਆਪਣੀ ਸਕੂਲੀ ਪੜ੍ਹਾਈ ਦ ਸਿੰਧੀਆ ਸਕੂਲ ਤੋਂ ਪ੍ਰਾਪਤ ਕੀਤੀ ਅਤੇ 1980 ਵਿੱਚ ਆਈ.ਆਈ.ਟੀ. ਖੜਗਪੁਰ ਤੋਂ ਗ੍ਰੈਜੂਏਸ਼ਨ ਕੀਤੀ। ਆਪਣੀ ਪੜ੍ਹਾਈ ਪੂਰੀ ਕਰਨ ਤੋਂ ਬਾਅਦ ਉਹ ਉੜੀਸਾ ਵਿੱਚ ਆਪਣੇ ਪਰਿਵਾਰਕ ਕਾਰੋਬਾਰ ਨਾਲ ਜੁੜ ਗਏ। 1984 ਵਿਚ ਉਨ੍ਹਾਂ ਨੇ ਸੁਤੰਤਰ ਤੌਰ 'ਤੇ ਆਪਣਾ ਉਦਯੋਗ ਸਥਾਪਿਤ ਕਰਨ ਦਾ ਫ਼ੈਸਲਾ ਕੀਤਾ ਅਤੇ ਪੌਲੀਪਲੈਕਸ ਦੀ ਨੀਂਹ ਰੱਖੀ। ਸੰਜੀਵ ਨੇ ਉੱਚ ਕ਼ਦਰਾਂ-ਕ਼ੀਮਤਾਂ ਅਤੇ ਆਦਰਸ਼ਾਂ ਉੱਤੇ ਆਧਾਰਿਤ ਇਕ ਮਿਸਾਲੀ ਸੰਸਥਾ ਕ਼ਾਇਮ ਕੀਤੀ, ਜਿਸ ਨੂੰ ਉਦਯੋਗ ਜਗਤ ਅਤੇ ਵਿੱਤੀ ਬਾਜ਼ਾਰਾਂ ਵਿਚ ਵਿਆਪਕ ਸਨਮਾਨ ਅਤੇ ਪ੍ਰਸ਼ੰਸਾ ਪ੍ਰਾਪਤ ਹੈ। ਕੰਪਨੀ ਭਾਰਤ ਅਤੇ ਥਾਈਲੈਂਡ ਦੋਹਾਂ ਦੇ ਸ਼ੇਅਰ ਬਾਜ਼ਾਰਾਂ ਵਿੱਚ ਸੂਚੀਬੱਧ ਹੈ। ਮੂਲ ਰੂਪ ਵਿੱਚ ਇੱਕ ਉਦਮਸ਼ੀਲ ਸ਼ਖ਼ਸੀਅਤ ਹੋਣ ਦੇ ਨਾਤੇ ਸੰਜੀਵ ਸਰਾਫ਼ ਨੇ ਹੋਰ ਕਈ ਸਫਲ ਉਪਰਾਲਿਆਂ ਨੂੰ ਵੀ ਜਨਮ ਦਿੱਤਾ ਹੈ। ਇਨ੍ਹਾਂ ਵਿਚ ਮਨੁਪਾਤਰਾ ਵਿਸ਼ੇਸ਼ ਤੌਰ 'ਤੇ ਜ਼ਿਕਰਯੋਗ ਹੈ, ਜੋ ਭਾਰਤ ਦੀ ਪ੍ਰਮੁੱਖ ਕਾਨੂੰਨੀ ਜਾਣਕਾਰੀ ਪ੍ਰਦਾਨ ਕਰਨ ਵਾਲੀ ਸੰਸਥਾ ਹੈ। ਵਾਤਾਵਰਨ ਪ੍ਰਤੀ ਉਨ੍ਹਾਂ ਦੀ ਗੰਭੀਰ ਚਿੰਤਾ ਨੇ ਉਨ੍ਹਾਂ ਨੂੰ ਨਵਿਆਉਣਯੋਗ ਊਰਜਾ ਖੇਤਰ ਵਿੱਚ ਨਿਵੇਸ਼ ਕਰਨ ਲਈ ਪ੍ਰੇਰਿਤ ਕੀਤਾ। ਇਸ ਦੇ ਨਤੀਜੇ ਵਜੋਂ ਪੰਜਾਬ, ਉੱਤਰਾਖੰਡ ਅਤੇ ਸਿੱਕਿਮ ਵਿੱਚ ਕਈ ਜਲ-ਵਿਦਯੁਤ ਪ੍ਰੋਜੈਕਟਾਂ ਦੀ ਸ਼ੁਰੂਆਤ ਕੀਤੀ ਗਈ। ਉਹ ਵੱਖ-ਵੱਖ ਉਦਯੋਗਾਂ ਨਾਲ ਸੰਬੰਧਿਤ ਕਈ ਕੰਪਨੀਆਂ ਦੇ ਬੋਰਡਾਂ 'ਤੇ ਵੀ ਸਰਗਰਮ ਮੈਂਬਰ ਵਜੋਂ ਸੇਵਾ ਨਿਭਾ ਰਹੇ ਹਨ।
ਲੇਖਕ ਅਤੇ ਅਨੁਵਾਦਕ ਵਜੋਂ ਵੀ ਸੰਜੀਵ ਸਰਾਫ਼ ਦੀ ਵਿਸ਼ੇਸ਼ ਪਛਾਣ ਹੈ। ਉਨ੍ਹਾਂ ਦੀਆਂ ਅੱਠ ਪੁਸਤਕਾਂ ਪ੍ਰਕਾਸ਼ਿਤ ਹੋ ਚੁੱਕੀਆਂ ਹਨ, ਜਿਨ੍ਹਾਂ ਵਿਚੋਂ ਹਰ ਇਕ ਉਰਦੂ ਸ਼ਾਇਰੀ ਦੀ ਨਜ਼ਾਕਤ, ਸੁੰਦਰਤਾ ਅਤੇ ਅਜ਼ਮਤ ਦੇ ਕਿਸੇ ਨਾ ਕਿਸੇ ਵਿਲੱਖਣ ਪੱਖ ਨੂੰ ਉਜਾਗਰ ਕਰਦੀ ਹੈ।
ਮਨੁੱਖਤਾਵਾਦੀ ਸੋਚ ਦੇ ਮਾਲਕ ਸੰਜੀਵ ਸਰਾਫ਼ ਆਪਣੀ ਕੰਪਨੀ ਦੀਆਂ ਸਮਾਜਿਕ ਅਤੇ ਭਾਈਚਾਰਕ ਭਲਾਈ ਨਾਲ ਸੰਬੰਧਿਤ ਪਹਿਲਕ਼ਦਮੀਆਂ ਵਿਚ ਨਿੱਜੀ ਦਿਲਚਸਪੀ ਲੈਂਦੇ ਹਨ। ਇਨ੍ਹਾਂ ਵਿਚ 1200 ਵਿਦਿਆਰਥੀਆਂ ਵਾਲਾ ਇਕ ਗ਼ੈਰ-ਮੁਨਾਫ਼ਾ ਵਿਦਿਅਕ ਸੰਸਥਾਨ ਵੀ ਸ਼ਾਮਿਲ ਹੈ। ਉਹ ਇਕ ਗੰਭੀਰ ਅਤੇ ਨਿਰੰਤਰ ਪਾਠਕ ਹਨ, ਉਰਦੂ ਸ਼ਾਇਰੀ ਨਾਲ ਡੂੰਘਾ ਲਗਾਅ ਰੱਖਦੇ ਹਨ ਅਤੇ ਹਾਲ ਹੀ ਵਿੱਚ ਉਨ੍ਹਾਂ ਨੇ ਉਰਦੂ ਭਾਸ਼ਾ ਵੀ ਸਿੱਖੀ ਹੈ। ਇਸ ਤੋਂ ਇਲਾਵਾ ਉਹ ਕਲਾ ਅਤੇ ਸੰਗੀਤ ਦੇ ਵੀ ਸ਼ੌਕ਼ੀਨ ਹਨ।